O Concello de Oroso participou na inauguración do certame artístico GóisOrosoArte, que tivo lugar este venres ás 18:00 horas na localidade portuguesa de Góis onde acudiron o alcalde de Oroso, Alex Doval, e concelleira de cultura, María Requejo. Este evento, que se celebra dentro do marco de irmandade entre as localidades de Oroso e Góis, ten como temática nesta edición "Liberdade e Interculturalidade".

Ao mesmo tempo, desde o pasado luns, un grupo de mozos de Oroso atópase en Góis participando nun intercambio cultural, promovendo así a colaboración e o entendemento entre as dúas comunidades así como o desenvolvemento cultural entre os xóvenes. Da mesma forma, un grupo de rapaces de Góis participará no intercambio no mes de setembro acudindo a Oroso.

GóisOrosoArte é unha exposición artística que se realiza tanto en Oroso como en Góis, fomentando a creación e a participación de artistas novos e consolidados. A quenda de Oroso terá lugar en setembro, e os artistas plásticos de ata 35 anos, así como artistas locais consolidados de calquera idade están convidados a participar.

Entre as obras que se presentarán no certame, un xurado seleccionará tres obras de Oroso que serán enviadas e expostas na Cámara Municipal de Góis durante o mes de novembro. De igual maneira, Góis enviará as súas tres mellores obras, que serán expostas na Casa do Concello de Oroso, creando así un intercambio cultural e artístico entre ambas as localidades.
As bases están dispoñibles na web do Concello.

Este evento reflicte a nosa aposta pola liberdade, a interculturalidade e a cooperación internacional.