O Concello de Oroso tivo a honra de recibir esta mañá a visita oficial da embaixadora de Hungría en España, Katalin Tóth, quen se desprazou ata o noso municipio para render homenaxe ao peregrino János Zádori, o primeiro peregrino húngaro coñecido que percorreu o Camiño de Santiago ao seu paso por Oroso hai 150 anos.

A embaixadora, acompañada pola tenente de alcalde, Lidia López, realizou unha emotiva ofrenda floral ante a placa conmemorativa de Zádori, situada nas inmediacións do Camiño en Sigüeiro. Este acto simboliza non só a fraternidade entre os pobos húngaro e galego, senón tamén a importancia histórica e cultural do Camiño de Santiago como nexo de unión entre nacións e persoas de todo o mundo.

Durante o seu discurso, Katalin Tóth destacou a profunda conexión que o pobo húngaro sente co Camiño e lembrou a figura de János Zádori como un pioneiro que contribuiu a estreitar lazos entre Hungría e Galicia a través do Camiño. Pola súa parte, Lidia López agradeceu a visita da embaixadora e expresou o orgullo de Oroso por formar parte deste legado histórico, manifestando o compromiso do Concello de seguir impulsando a relevancia cultural do Camiño de Santiago no municipio.