Os Concellos de Oroso e Frades iniciarán as obras de acondicionamento da estrada que dá acceso ao núcleo de Castiñeiro Redondo, unha actuación conxunta que supón un investimento total de 54.626 euros. O proxecto, que conta cunha importante achega da Xunta de Galicia superior aos 47.000 euros, será cofinanciado por ambas entidades locais para mellorar a seguridade e accesibilidade nun viario compartido polos dous municipios.

A intervención abrangue un total de 1.350 metros de lonxitude, distribuídos en dous tramos: 915 metros no termo municipal de Frades, concretamente na parroquia de Moar, e outros 435 metros no municipio de Oroso, na parroquia de Calvente. En todo o percorrido manterase un ancho constante de 4,5 metros, co obxectivo de garantir a fluidez do tráfico e a seguridade dos usuarios.

As obras inclúen o bacheo previo do firme, a limpeza de gabias e salvagabias, o aglomerado da estrada e a correspondente sinalización horizontal. No tramo que corresponde a Frades tamén está prevista a colocación dun sinal de STOP na entrada do vial, mentres que se mellorarán arredor de 300 metros cadrados de abanicos para reforzar a seguridade viaria.

Esta actuación, que será executada pola empresa Canarga SL, está previsto que comece a finais deste mes de agosto e que remate antes de mediados de outubro, sempre que as condicións meteorolóxicas o permitan. Trátase dunha obra especialmente significativa para a veciñanza, xa que mellorará a mobilidade diaria e reducirá o risco de accidentes, especialmente entre a poboación escolar e as persoas maiores que residen ou se desprazan con frecuencia por esta zona.

Tanto o Concello de Frades como o de Oroso coinciden en salientar a importancia deste tipo de proxectos compartidos, que dan resposta a necesidades reais da cidadanía e contribúen ao equilibrio territorial e á cohesión entre núcleos rurais próximos. A mellora do firme, xunto co reforzo da sinalización, evitará o progresivo deterioro da vía e incrementará a súa durabilidade, o que se traduce nun aforro económico e nunha mellor calidade de vida para os usuarios.