O Concello de Oroso vén de rematar unha serie de melloras no Local de Maiores, co obxectivo de ofrecer un espazo máis cómodo, moderno e accesible para a veciñanza. As actuacións realizáronse grazas a un convenio co Consorcio Galego de Servizos de Igualdade e Benestar da Xunta de Galicia.               

Entre as principais novidades atópanse:

• Renovación do mobiliario
• Mellora da iluminación
• Instalación dun sistema de climatización
• Colocación dunha nova tarima
• Pintado interior completo

O investimento total ascendeu a arredor de 20.000 euros, unha achega que permitirá que as persoas maiores do municipio conten cun espazo adaptado ás súas necesidades, preparado para actividades, encontros e momentos de lecer en condicións óptimas.

O alcalde de Oroso, Álex Doval, destacou que estas obras “son unha mostra do compromiso do Concello co benestar das nosas persoas maiores, que merecen dispoñer dun lugar digno e acolledor onde compartir tempo e experiencias”.

Con estas melloras, o Local de Maiores xa está aberto e dispoñible para o seu uso, converténdose de novo nun punto de encontro clave para a socialización e dinamización da vida comunitaria en Oroso.