O Concello de Oroso informa de que o programa Bono Activa Comercio volve estar dispoñible a partir de hoxe, ofrecendo descontos de ata 30 euros nas compras realizadas nos establecementos adheridos.

Esta iniciativa, promovida pola Xunta de Galicia coa colaboración das entidades locais, busca fomentar o consumo nos comercios de proximidade e apoiar ao pequeno comercio, un dos motores económicos fundamentais do municipio.



A partir de hoxe mesmo, as persoas interesadas poden descargar o seu bono a través da aplicación móbil ou da web oficial do programa, e comezar a canxear os descontos nas súas compras nos negocios adheridos de Oroso.

O alcalde de Oroso, Álex Doval, destacou que “este tipo de programas son unha excelente oportunidade para dinamizar o comercio local e, ao mesmo tempo, ofrecer ás veciñas e veciños un incentivo para facer as súas compras no noso municipio”.

Desde o Concello de Oroso anímase a toda a veciñanza a participar nesta iniciativa e a apoiar o comercio de proximidade, que contribúe a manter vivo o tecido económico e social da vila.

Como funciona?
Cada cliente disporá como máximo dun bono desconto por un importe de ata 30€ que poderá descontar en función do crédito dispoñible nos distintos establecementos comerciais adheridos e que estarán identificados co distintivo da campaña.

No caso de esgotamento do crédito do programa, os bonos descargados xa non se poderán utilizar.

A través do seguinte enderzo poderás solicitar o teu Bono Activa Comercio seguindo uns sinxelos pasos: https://www.bonosactivacomercio.gal/.

Consultar os comercios de Oroso adheridos