O Concello de Oroso informa de que hoxe se asinou o convenio de colaboración coa Xunta de Galicia que permitirá realizar un investimento de 150.000 euros na Escola Infantil Municipal da Ulloa, destinado á mellora das súas instalacións e á modernización dos seus servizos educativos.

O acordo foi asinado polo alcalde de Oroso, Álex Doval, e pola conselleira de Política Social e Igualdade, Fabiola García, no marco dunha visita institucional ao centro, durante a cal se puxo en valor o papel fundamental das escolas infantís municipais como servizo público esencial para a conciliación da vida familiar e laboral.

Este investimento enmárcase nas políticas da Xunta de Galicia de apoio ás entidades locais para a mellora da rede pública de atención á primeira infancia, co obxectivo de garantir espazos educativos seguros, accesibles e adaptados ás necesidades actuais dos nenos e nenas de 0 a 3 anos.

As actuacións previstas inclúen diversas melloras no interior do edificio, entre as que destacan a renovación da instalación eléctrica, a substitución de portas e ventás, así como a actualización do mobiliario e do equipamento das aulas, co fin de mellorar o confort, a eficiencia enerxética e a funcionalidade dos espazos.

Ademais, o proxecto contempla a creación dun novo parque infantil exterior, cunha área de xogos totalmente renovada, terreo adaptado, elementos homologados e zonas verdes, favorecendo así o xogo ao aire libre e o desenvolvemento físico e social do alumnado nun entorno seguro.

Segundo o previsto, a actuación será licitada ao longo deste ano, co obxectivo de executar as obras durante o mes de agosto, coincidindo co peche estival do centro, de maneira que non se vexa afectado o normal funcionamento do servizo nin a atención ás familias.

Desde o Concello de Oroso valórase moi positivamente esta actuación, que supón un paso máis no compromiso municipal coa educación infantil de calidade, a mellora das infraestruturas públicas e o apoio ás familias do municipio, reforzando un servizo clave para o benestar social e o desenvolvemento da comunidade.