O Concello de Oroso inaugurou esta tarde o campo do Lino Balado tras a renovación integral do seu terreo de xogo unha actuación moi demandada pola veciñanza e polos clubs deportivos locais que permite mellorar notablemente as instalacións deportivas municipais e ofrecer un espazo en mellores condicións para a práctica do fútbol.

O acto contou coa presenza do presidente da Federación Galega de Fútbol Pablo Prieto, así como do alcalde de Oroso, Álex Doval e do concelleiro de Deportes, Carlos Fernández, ademais de directivos de clubs e deportistas que quixeron acompañar este momento tan significativo para o deporte en Oroso.

A renovación do terreo de xogo supón un paso importante na aposta do Concello por dotar ás instalacións deportivas de mellores condicións de seguridade calidade e funcionalidade, favorecendo tanto o uso por parte dos equipos federados como a práctica deportiva da base e da veciñanza en xeral.
Unha actuación que contou cun investimento próximo aos 200.000 euros e que culminou coa instalación dun céspede artificial de alta calidade, que acadou o selo FIFA Quality Pro, certificación que garante os máis altos estándares internacionais en rendemento, seguridade e durabilidade.

No marco desta xornada tamén tivo lugar a entrega dos trofeos de campións de liga aos equipos da ED Xuventude de Oroso correspondentes á tempada anterior concretamente aos conxuntos Alevín A Alevín B Alevín C e Benjamín C, recoñecendo así o esforzo o traballo e os bos resultados acadados polos máis novos.

A xornada deportiva completouse coa celebración do encontro de liga entre o Sigüeiro F C e o Burela S D, no que o equipo local conseguiu unha importante vitoria sumando os tres puntos nun ambiente de gran participación e apoio desde a bancada.

Desde o Concello de Oroso reafirmamos o noso compromiso coa mellora continua das infraestruturas deportivas, co apoio ao deporte base e ao deporte local como ferramentas fundamentais para promover hábitos de vida saudables valores de convivencia e cohesión social no municipio