O Concello de Oroso será escenario o vindeiro domingo 15 de marzo dunha nova parada da Liga FITE Galicia 2026, unha competición autonómica de taekwondo ITF (International Taekwon-Do Federation) que reúne ao longo da tempada a deportistas de diferentes clubs galegos.

A xornada celebrarase no Pavillón Juanito Amigo Ferreiro, que se converterá durante toda a mañá nun punto de encontro para o deporte base e a competición nesta disciplina, acollendo a numerosos participantes procedentes de distintos puntos de Galicia.

A Liga FITE Galicia forma parte do calendario deportivo da Federación Internacional de Taekwon-Do en Galicia e ten como obxectivo promover a práctica deste deporte, favorecer a competición entre clubs e ofrecer ás e aos deportistas unha oportunidade para medir o seu nivel, mellorar a súa preparación e adquirir experiencia competitiva.

Durante o evento disputaranse diferentes probas nas categorías correspondentes ás distintas idades e niveis, nun ambiente que combina competición, compañeirismo e valores deportivos como o respecto, a disciplina e o espírito de superación, principios fundamentais desta arte marcial.

A celebración desta xornada en Oroso reforza tamén o papel do municipio como sede de eventos deportivos de ámbito autonómico, contribuíndo á promoción do deporte e á dinamización da vida deportiva local.

Desde o Concello de Oroso animamos á veciñanza e ás persoas afeccionadas ao deporte a achegarse ao pavillón e gozar desta xornada dedicada ao taekwondo, ao esforzo e á competición saudable.