O Concello de Oroso fai un chamamento á responsabilidade cidadá para evitar o abandono de colchóns, mobles e outros residuos voluminosos na vía pública ou xunto aos colectores, unha práctica incívica que afecta negativamente á imaxe do municipio, provoca molestias á veciñanza e dificulta o correcto funcionamento dos servizos municipais de limpeza e recollida.

Nas últimas semanas detectáronse distintos episodios deste tipo en varios puntos do concello, situacións que ademais de xerar sucidade e impacto visual poden ocasionar problemas de seguridade e salubridade nos espazos públicos.

Desde o Concello recórdase que existe un servizo específico de recollida de residuos voluminosos, establecido para facilitar a correcta retirada deste tipo de materiais e evitar depósitos incontrolados.

A recollida realízase:

• O primeiro venres de cada mes nas parroquias
• O primeiro sábado de cada mes en Sigüeiro e na urbanización Porto Avieira

Podes consultar na web do concello toda a información sobre a recollida de residuos.

O Concello tamén informa de que estas incidencias foron trasladadas á Policía Local para o seu seguimento e control, co obxectivo de evitar que este tipo de comportamentos se repitan e garantir o cumprimento das normas de convivencia e limpeza viaria.

Así mesmo, solicítase a colaboración da cidadanía para detectar e comunicar este tipo de actuacións incívicas. Calquera veciño ou veciña que observe o depósito de colchóns, mobles ou residuos voluminosos fóra das datas establecidas pode poñerse en contacto coa Policía Local.

Desde o Concello de Oroso insístese na importancia de facer un uso responsable dos servizos municipais e de coidar entre todos os espazos públicos, contribuíndo a manter un concello máis limpo, ordenado e agradable para toda a veciñanza.

“O espazo público é de todos e respectalo tamén é responsabilidade de todos”.