O Concello de Oroso desexa a toda a veciñanza unha feliz noite de San Xoán, unha das celebracións máis arraigadas e especiais do calendario festivo galego, marcada polo encontro, a tradición e a convivencia arredor do lume.

Con motivo desta festividade, e tendo en conta as altas temperaturas rexistradas nos últimos días, o Concello fai un chamamento á máxima responsabilidade e prudencia para que a celebración se desenvolva con todas as garantías de seguridade.

Nas últimas semanas, o Concello abriu o prazo para solicitar as autorizacións necesarias para a realización de cacharelas, lembrando a importancia de cumprir as condicións establecidas e adoptar todas as medidas preventivas para evitar riscos para as persoas, os bens e o medio natural.

Neste sentido, recoméndase:

• Realizar lume unicamente nas cacharelas previamente autorizadas e respectando en todo momento as condicións establecidas
• Extremar as precaucións en zonas próximas a vivendas, vehículos, instalacións, masas forestais ou espazos con vexetación
• Manter unha correcta hidratación durante toda a xornada, especialmente nas horas de maior calor
• Prestar especial atención aos nenos e nenas, ás persoas maiores e a aquelas persoas máis vulnerables fronte ás altas temperaturas
• Dispoñer de medios básicos de prevención e manter sempre a vixilancia sobre o lume ata a súa completa extinción

Desde o Concello de Oroso lémbrase tamén a importancia de evitar a queima de materiais contaminantes ou perigosos e de deixar os espazos utilizados en perfectas condicións de limpeza unha vez rematada a celebración, retirando todos os residuos xerados.

San Xoán forma parte da nosa identidade cultural e constitúe unha ocasión para compartir momentos de encontro coa familia, cos amigos e coa veciñanza. Por iso, é fundamental compatibilizar a tradición co respecto pola contorna e coa seguridade de todos.

O Concello de Oroso agradece a colaboración da cidadanía e anima a gozar desta noite máxica con responsabilidade, convivencia e respecto polo noso municipio.

Feliz noite de San Xoán a toda a veciñanza de Oroso.