O Concello de Oroso iniciará nos próximos días unha nova actuación destinada á mellora e renovación do mobiliario urbano do casco urbano de Sigüeiro, co obxectivo de continuar modernizando os espazos públicos e ofrecer á veciñanza contornas máis coidadas, funcionais e confortables.

Os traballos comezarán coa retirada dos bancos e papeleiras actualmente instalados nas zonas obxecto da actuación. Posteriormente, ao longo da próxima semana, procederase á instalación do novo mobiliario urbano, dando continuidade ao proceso de renovación e mellora do espazo público que se está a desenvolver no núcleo urbano.

A actuación conta cun investimento superior aos 30.000 euros e é posible grazas ao financiamento conxunto da Asociación de Desenvolvemento Comarca de Ordes (ASDECOMOR), da Xunta de Galicia e do propio Concello de Oroso.

Esta colaboración entre administracións e entidades permite impulsar unha intervención que contribuirá a mellorar a imaxe urbana de Sigüeiro e, ao mesmo tempo, a dotar os seus espazos públicos de elementos máis adecuados para o uso diario da cidadanía.

A renovación do mobiliario urbano forma parte do compromiso municipal coa mellora progresiva do casco urbano, actuando sobre aqueles elementos que, polo seu uso continuado ou polo paso do tempo, precisan ser substituídos e actualizados.

Os novos bancos e papeleiras permitirán ofrecer espazos máis agradables e axeitados para o descanso e a convivencia, ao tempo que contribuirán a manter unha contorna urbana máis coidada e ordenada.

O Concello de Oroso agradece a colaboración da Asociación de Desenvolvemento Comarca de Ordes e da Xunta de Galicia, que fan posible, xunto coa achega municipal, levar adiante este investimento.

Durante os próximos días, a execución dos traballos poderá ocasionar algunhas molestias puntuais ou limitacións no uso de determinados espazos, polo que dende o Concello se solicita a comprensión e colaboración da veciñanza durante o desenvolvemento da actuación.

Esta intervención súmase ás diferentes actuacións que o Concello de Oroso está a impulsar para mellorar, modernizar e humanizar os espazos públicos de Sigüeiro, co obxectivo de continuar avanzando cara a un núcleo urbano máis cómodo, accesible e agradable para vivir e desfrutar.

O Concello de Oroso continúa traballando na mellora dos espazos públicos e agradece á veciñanza a súa colaboración durante a execución dos traballos.