O Concello de Oroso sumouse esta tarde á concentración convocada pola Federación Española de Municipios e Provincias (FEMP) como mostra de solidariedade e apoio á cidade autónoma de Ceuta e á súa cidadanía.

A Praza do Concello acolleu este acto cívico no que veciños e veciñas de Oroso quixeron expresar o seu respaldo á convocatoria promovida pola FEMP e trasladar unha mensaxe de solidariedade, convivencia e unidade.

Durante o acto procedeuse á lectura do manifesto elaborado pola Federación Española de Municipios e Provincias, que foi lido por Rafael Arriaga, veciño ceutí residente en Porto Avieira. A súa participación achegou un significado especialmente próximo e persoal a esta convocatoria, establecendo unha ligazón directa entre a realidade vivida en Ceuta e a veciñanza de Oroso.

A concentración desenvolveuse nun ambiente de respecto e participación cidadá, reunindo persoas que quixeron sumarse a esta iniciativa e mostrar o seu apoio á cidadanía ceutí.

Desde o Concello de Oroso quérese agradecer a todas as persoas que se achegaron ata a Praza do Concello para participar neste acto e acompañar esta mostra colectiva de solidariedade.

Con esta convocatoria, Oroso sumouse aos numerosos municipios de toda España que responderon ao chamamento da FEMP, facendo visible desde o ámbito local unha mensaxe común de apoio, convivencia e solidariedade.

O Concello de Oroso reafirma así o seu compromiso cos valores de respecto, diálogo e convivencia, e agradece unha vez máis a implicación da veciñanza neste tipo de iniciativas que contribúen a fortalecer os lazos de solidariedade entre os pobos e territorios.